Машгьур скрипач - Дагъустанда
19-мартдиз Махачкъалада Урусрин М.Горькийдин тIварунихъ галай драмтеатрда машгьур музыкантрин сихилдин векил Дмитрий Когана мергьяматлувилин концерт гана.
Мярекат ачухдайла РД-дин культурадин министр Зарема Бутаевади и концерт республикадин культурадин тарихда лишанлу вакъиадиз элкъведайдакай лагьана.
— Чаз къе РФ-дин лайихлу артист Дмитрий Когана рикIик кужумдай музыкадиз яб акалдай мумкинвал ганва. Къейд авун лазим я, бажарагълу музыкантдин репертуарда Николо Паганинидин 24 каприсдикай ибарат цикл ава. Дуьньядин винел и цикл тамамарзавай скрипачар тупIаралди гьисабиз жеда. Къенин пресс-конференциядал малум хьайивал, Дмитрий Павловични Паганини са юкъуз дидедиз хьана. Коган хейлин проектрин автор я. “Са концертда чIехи вад скрипка” тIвар алай проект иллаки итижлуди я. РД-дин Кьил Рамазан Абдулатипова, РД-дин Халкьдин Собранидин Председатель Хизри Шихсаидова Дмитрий Коганан тIварцIихъ саламар рекье туна. Чазни машгьур скрипачдиз чи республикадиз мугьман хьунай ва концерт гунай сагърай лугьуз кIанзава, — къейдна З.Бутаевади.
Зал сиве-сивди ацIанвай. Сегьнедиз мярекатдин кьилин игит Дмитрий Коган экъечIна. Артистди вич хушдиз кьабулунай виридаз чухсагъул малумарна ва вичин концерт XVIII асирда буьркьуь дишегьли Мария Терези Фон Парадиса кхьей “Сицилиана” яратмишунилай эгечIна. Концертдин программадин сергьятра аваз тамашачийриз Франц Шубертан, Петр Чайковскийдин, Бенжамин Годаран, Джон Уильямсан, Дмитрий Шостаковичан ва масабурун композицийрихъ яб акалдай мумкинвал хьана.
Концертдин эхирдай сегьнедиз региондин “Сад тир Россия” партиядин секретардин заместитель, РД-дин Халкьдин Собранидин Председателдин сад лагьай заместитель Юрий Левицкий экъечIна. Ада республикадин руководстводин патай музыкантдиз сагърай лагьана ва ада гайи концертди дагъвийрин рикIера гел тадайди къейдна. Республикадин музыкадин школайриз хсуси дискар ва мергьяматлувилин концерт гунай Ю.Левицкийди Д.Коганав Дагъустандин парламентдин чIехи награда — Гьуьрметдин грамота вахкана. Идалай гъейри, машгьур скрипачдиз Унцукулдин ва Кубачидин устIарри гьазурнавай ядигарар багъишна.
* * *
Концертдин вилик Махачкъалада Р.Гьамзатован тIварунихъ галай Милли библиотекада Дмитрий Коганахъ галаз пресс-конференция кьиле фена. Ана РД-дин культурадин министр Зарема Бутаевадини иштиракна. Дагъларин уьлкведа кьиле фейи мергьяматлувилин концерт “Сад тир Россия” партиядин куьмекдалди тешкилнавайди тир.
Д.Коганан гафаралди, Дагъустан ада ихьтин концертар ганвай 57-регион я.
— Бинедай мергьяматлувилин концертар гун “Магьир музыкадин вахт” проект вилик тухунихъ галаз алакъалу тир. Планрик Россиядин анжах 10-12 шегьерда ихьтин мярекатар тешкилун квай. Амма проектдиз хейлинбуру итиж авурвиляй концерт гваз уьлкведин вири регионриз мугьман хьун фикирдиз къачуна. Мергьяматлувилин серенжем алай йисан 9-июндиз Москвада концерт гуналди куьтягь жеда, — лагьана Д.Когана.
Пресс-конференциядал малум хьайивал, машгьур артистдив гвай “Робрехт” тIвар алай скрипка 1728-йисуз Джузеппе Гварнериди арадал гъанвайди я. Са вахтунда адал Мария-Антуанетта, Франциядинни Бельгиядин скрипкайрин школа арадал гъайи Андре Робберехтс къугъванай. Гуьгъуьнлай и скрипка шведрин пачагьдин, американви са миллионердин, итальянви бизнесмендин гъилени хьана. Вахтар алатайла, Коганан тIварунихъ галай культурадин надир проектар вилик тухуниз куьмекзавай Фонд себеб яз, скрипка Дмитрий Коганав агакьна.
Пресс-конференциядин эхирдай Дмитрий Когана республикадин культурадин хиле кIвалахзавай къуллугъчийрин, Дагъустандин манидарринни музыкантрин тIварцIихъ хуш келимаяр лагьана.
Насима велибегова